國立臺灣工藝研究發展中心於114年7月23日「台語工藝詞庫啟用宣傳記者會」邀請以台語傳統說唱藝術推廣唸歌文化的微笑唸歌團，由儲見智先生及林恬安女士以唸歌方式，融入工藝語詞進行表演，以不同的方式呈現台語工藝詞語，藉此讓更多人能了解與認識，並加深對台語工藝語詞的印象。

工藝台灣話
演出：微笑唸歌團/儲見智、林恬安

【演出稿】
各位朋友大家好，阮是微笑唸歌團！
真歡喜會當來到工藝館
講台語、唱台語
邀請大家用台語來了解台灣的工藝

列位貴君阮總請
先請老輩後請少年兄
工藝傢俬、手路，欲用台灣話講予恁大家聽，
千萬毋倘袂記恁的噗仔聲。

台語是古早流傳的古漢語
內中真濟先人的智慧
咱著愛繼續傳落去
代代相傳展新枝

台語的氣口、台語的感情，
是華語無法度表現的
親像咱去食物件
講：老闆，我要一份蚵仔煎.....
你是咧講啥？ 蚵仔煎
老闆，給我一個碗粿
碗粿啦！講彼是誰聽有。

工藝嘛同款啊！逝版亂翻作蛇板
柸仔、柸刀、剾刀、剾板、跳刀，塗剾仔
攏是講刮刀
哇，按呢毋攏亂去啊！

猶閣有喔，對着美的講法，嘛毋共款
親像講查某囡仔誠水
柳葉眉、蔥管鼻、鳳眼、鯉魚嘴

保存台語愛認真，祖先智慧藏內面
學工藝的功夫愛謹慎
工藝台語的專業話
嘛愛捌了深、著愛講予真

這款專業的語詞，咱愛去佗位學？
工藝中心有拍算，主任胸坎一頓，
講這款代誌我來擔當，計畫著愛兩年長，
將11項的工藝，專用的台語，收集甲真十全。

兵分四面八方路
有人收集語詞、有人拍影片
有人負責台語文字
專家出手袂糊塗
成果全攏囥網路，算來一千兩百組。

真正用心佮計較，精彩工藝說透流，
望恁支持佮指教，保存咱的傳統文化
變做世界第一𠢕

傳統文化強欲無，奉勸大家緊來學
工藝中心先將香火點予燃
臺灣文化毋通來拍無！